حلم البنية
شعر/ سامى النجار
على ضهر مهرة تدله على الطريق لو تاه
فيه م الشهامة أمارة والشبه عنتــــــــــــر
أسمر وعربى ........ العزة مقصده ومناه
أنا عنتر .. انا الاسمر .. وقد هواكى يا عبلة
دراعى حديد ؛و بأسى شديد وعندى الجدعنة خصلة
أنا غالى ومش خالى ............ ولى فى البلد شغلـــــة
وأنا عنتر
وإيه كمان يا أبو الشجعان
يا أحلى غنوة لاحلى زمان
أنا عنتر ، أنا الفلاح ......... وواهب للبلد عمرى
أفوت ع الضلمة تبقى صباح بعزمى وقوتى وصبرى
لا اكل فى يوم ولا أرتاح ومن عرقى يكون مهرى
و أنا عنتر
يا وردة فى سدر بلدنا ، يا نن عين مصر
يا صورة لاحلى شبابنا ، شفنا على ايديك النصر
وح اعيش وياك ع المرة ، وح تبقى العشة قصر
أنا عنتر وفارش سكتك بالورد
وشايل ما بين ضلوعى يا عبلة ود
يملا حياتنا بالهنا......... و بالسعد
أنا الكادح ، ومن كدى ح تاكلى الشهد
عزيمتى نار ، وليلى نهار ، ونفسى صهد
و أنا عنتر
لو نملا قلوبنا حب و ايدينا فى ايدين بعض
ح يعود من تانى الود ولا يبقى زينا حــــــــــــــد
وبلال ح يأذن تانى يجمع شمل الأحباب
الله عليك يا وطنــــا من غير عدو و أغراب
والله عليك يا عنتـــر لما بالحب تكبـــــــــــر
وإحنا بنقـــول وياك الله أكبر ..... الله أكبر
Comment