صرخة أم )

عمالة اصرخ وانادى .. واقول ولادى ولادى
وكأنى باصرخ سكات

عمالة اقول الحقونى ..
دول الغيلان جردونى
وبرضة باصرخ سكات

صابكم خلاص الخرس ..
ولا ده خوف م الحرس
ولا صراخى سكات

عمالة اصرخ وانادى .. واقول ولادى ولادى
وكأنى باصرخ سكات

سرقوا خلاص ضحكتى ..
باعوا ياناس هدمتى
ولا حد سامع صرختى

يبيعوا فيّه ويشتروا..
وع الغلابة بيقتروا
وانتم سكارى فى سكتى

ماشيين بعمة وربابة ..
بتغنوا كدب وخيابة
تايهين فى توهة سكات

عمالة اصرخ ونادى .. واقول ولادى ولادى
وكأنى باصرخ سكات

الجبن مالى قلوبكم ..
والكلمة اللى حيلتكم
خلينا جنب الحيطان

خلينا عايشين فى حالنا ..
عايزين نربى عيالنا
خايفين ياخدكوا الطوفان

آدى الحيطان قسموها ..
وآدى العيال حطموها
ولسة برضة فى سكات

عمالة اصرخ وانادى .. واقول ولادى ولادى
وكأنى باصرخ سكات


الشاعر / حسام غزال