Tweet
عـَ الشــَّـــامْ
مْسافِرْ أنا ..
عِندي شِغلْ بالشـّــامْ
حاجزْ لَحاليُ مقعدي.. قِدّامْ
شاردْ كِنِتْ غِرْقانْ بـِ هْمومي
عَمْ قولْ هيهاتِ الزَّمنْ بَرّامْ
· فجأهْ... انْدسِّتْ راكبِهْ حدّي
متْلِ الـْ كأنّو خبْطِتِ مـْهدِّهْ
ضرْبِتْ خصِرْها قصِدْ بـِ خصري
لُكْ ما خطَرْلا تْقولْ.. ما قصْدي
وشْوّيْ زادِتْ غِنِجْها عْـليّي
وْ تِكيـِيتْ عـَ كتفي رقِبْتا تا تـْنامْ
· معقولْ..!!
... من هـَ البابْ لـّ الطّاقهْ..!!
جاوبِتْ حالي: مْطَقِطْقهْ خْلاقا
يمْكِنْ عـَ هالشَّغلاتْ هيّي مـْعوَّدِهْ
و بـْحضِرْتي بتزيدْ عشّاقا
فِهْمان أمرا وْ مِتِلْها أمتالْ
كتارْ الـْ متلها كتيرْ هـَ الإيّامْ
· بْرَمشتْ وجهي .. قَصِدْ غِضَّيْتِ النَّظَرْ
متلِ اللّي إنّو هيكْ ما عندي خبَرْ
جسْمي نَقَزْ فِزّيْتْ بـِ مـْحلّي
تاري إصِبْعا غَزّ ْ وبـْ خصْري حَفَرْ
جِلَّسْتْ حالي.. بـْرمِتْلا ضهري
وضِلِّيْتْ هيكِ مـْطلَّعِ لـْ قِدّامْ
· ونـْقَزْتْ مرّهْ تانيـِه فِزَّيْتْ
يـِلْعَنْ أبـُ... سِبَّيْتْ ما خِلَّيْتْ
ضَجـِّتْ ضِحِكْتا رَنـِّتِ بـْداني
بـِ تـْسِبْني ..!!
بـْ تَعْرفْ إنتْ شو حـْكَيْتْ
دِغري ضْربْتِ الكَفْ عـَ جبيني
قالتْ .. يا روحي إنتْ ما بـْ تِنلامْ
= 12/ 08/ 2004 = عباس سليمان علي ==
Comment